Այսօր մանկական քաղցկեղի միջազգային օրն է

Այսօր լրագրողների հետ հանդիպեց Հայ ուռուցքաբանների ասոցիացիայի նախագահ, մանկական ուռուցքաբանության և քիմիաթերապիայի բաժանմունքի ղեկավար Գրիգոր Բադալյանը:

Բանախոսը ներկայացրեց Հայաստանում մանկական քաղցկեղի վիճակագրությունը և ընդգծեց, որ աշխարհում մանկական ուռուցքներով հիվանդացությունը ավելի քիչ է, քան մեծահասակների հիվանդացությունը: «Հայաստանում գրանցվում են տարեկան մոտ 7000 չարորակ ուռուցքով հիվանդներ, որից մինչև 18 տարեկան հասակը գրանցվում է մոտ 80-100 դեպք»,- նշեց Գրիգոր Բադալյանը և հավելեց, որ քաղցկեղով հիվանդացության դեպքերը Հայաստանում այնքան են, որքան տարբեր երկրներում` ոչ ավել, ոչ էլ պակաս: «Աշխարհում չարորակ ուռուցքներով հիվանդացությունը շատանում է և վերջին 10 տարվա ընթացքում, ըստ համաշխարհային վիճակագրության` մոտ 15 տոկոսով շատացել է:

Երեխաների մոտ նկատվել է աճ` 7-8 տոկոս 10 տարվա մեջ», - շեշտեց Գ. Բադալյանը և հավելեց, որ այդ տվյալները համապատասխանում են նաև Հայաստանին: Ըստ նրա, քաղցկեղի հիվանդացության աճը նկատվում է նաև Հայաստանում, սակայն վիճակը այնքան տագնապալի չէ, որքան խոսվում է: Ինչ վերաբերում է մանկական քաղցկեղի բուժմանը, ապա մասնագետը նշեց, որ երեխաների մոտ ուռուցքի զարգացումը ավելի կարճ է տևում, և եթե բուժումն արդյունավետ է, ուռուցքը հետ է նահանջում: «Եթե երեխան բուժվելուց հետո 2 տարվա ընթացքում քաղցկեղը չի կրկնվում, ուրեմն երեխան համարվումն է լիովին բուժված»,- ընդգծեց Գրիգոր Բադալյանը:

Հարցեր, պատասխաններ, մեկնաբանություններ